മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്‍റെ രാജി ആവശ്യപ്പെട്ടും വോട്ടർപട്ടിക പരിഷ്കരണത്തിലെ അപാകതകൾക്കെതിരെയും പ്രതിപക്ഷം പ്രഖ്യാപിച്ച പ്രതിഷേധ പരിപാടിയുടെ ശൈലിയിലും രൂപത്തിലും ഇന്ത്യാ മുന്നണി മാറ്റം വരുത്തി. നേരത്തെ സംഘടിപ്പിക്കാൻ നിശ്ചയിച്ചിരുന്ന ‘മോക്ക് പാർലമെന്‍റ്’ എന്ന പേര് ഒഴിവാക്കി, പകരം ‘ജനകീയ കുറ്റവിചാരണ’ (പീപ്പിൾസ് ഇംപീച്ച്മെന്‍റ്) എന്ന പേരിൽ വിപുലമായ പ്രതിഷേധം നടത്താനാണ് മുന്നണി നേതാക്കളുടെ യോഗത്തിൽ അന്തിമ തീരുമാനമായത്. വെള്ളിയാഴ്ച ഉച്ചയ്ക്ക് 3:00 മണി മുതൽ വൈകിട്ട് 7:30 വരെ നീളുന്ന രീതിയിലാണ് ഈ പ്രതീകാത്മക വിചാരണ നടപടികൾ ക്രമീകരിച്ചിരിക്കുന്നത്.
മുൻ ലോക്സഭാ സ്പീക്കർ മീരാ കുമാറാണ് കുറ്റവിചാരണയുടെ നടപടിക്രമങ്ങൾക്ക് നേതൃത്വം നൽകി നിയന്ത്രിക്കുന്നത്. സമാജ്‌വാദി പാർട്ടിയിൽ നിന്നുള്ള ഒരു എം.പി ഇവരെ സഹായിക്കും. കോൺഗ്രസ് അധ്യക്ഷൻ മല്ലികാർജുൻ ഖാർഗെ പ്രമേയം അവതരിപ്പിച്ച് വാദങ്ങൾക്ക് തുടക്കം കുറിക്കുകയും, ലോക്സഭാ പ്രതിപക്ഷ നേതാവ് രാഹുൽ ഗാന്ധി ഉപസംഹാര പ്രസംഗം നടത്തുകയും ചെയ്യും. ഇന്ത്യാ സഖ്യത്തിലെ 19 രാഷ്ട്രീയ പാർട്ടികളിൽ നിന്നുള്ള പ്രതിനിധികൾ വിചാരണയിൽ പങ്കെടുത്തു സംസാരിക്കും. ഇതിൽ സമാജ്‌വാദി പാർട്ടിക്കും തൃണമൂൽ കോൺഗ്രസിനും 10 മിനിറ്റ് വീതവും മറ്റ് ഘടകകക്ഷികൾക്ക് 5 മിനിറ്റ് വീതവുമാണ് സമയം അനുവദിച്ചിട്ടുള്ളത്.
രാഷ്ട്രീയ നേതാക്കൾക്ക് പുറമേ, തീവ്ര വോട്ടർപട്ടിക പരിഷ്കരണത്തിലൂടെ (SIR) പട്ടികയിൽ നിന്ന് അന്യായമായി പേര് നീക്കം ചെയ്യപ്പെട്ട സാധാരണ പൗരന്മാർക്കും സിവിൽ സൊസൈറ്റിയിലെ മൂന്ന് പ്രതിനിധികൾക്കും വേദിയിൽ സംസാരിക്കാന്‍ അവസരം ലഭിക്കും. ആകെ മുപ്പതോളം പേരാണ് വിചാരണ നടപടികളുടെ ഭാഗമായി സംസാരിക്കുക. തിരഞ്ഞെടുപ്പ് പ്രക്രിയയുടെ സുതാര്യത തകർത്തുവെന്ന് ആരോപിച്ച് സംഘടിപ്പിക്കുന്ന ഈ പരിപാടി, കോൺഗ്രസിന്‍റെയും മറ്റ് സഖ്യകക്ഷികളുടെയും ഔദ്യോഗിക സോഷ്യൽ മീഡിയ, യൂട്യൂബ് ചാനലുകൾ വഴി രാജ്യവ്യാപകമായി തത്സമയം സംപ്രേഷണം ചെയ്യും. ദേശീയഗാനാലാപനത്തോടെയാകും ജനകീയ കുറ്റവിചാരണ സമാപിക്കുക.
