അബൂദാബി: ഗള്ഫിലെ യുദ്ധസാഹചര്യം തുടരുന്ന സാഹചര്യത്തില് വസന്തകാല അവധിക്ക് ശേഷം വീണ്ടും രണ്ടാഴ്ച്ചത്തേക്ക് വിദൂര വിദ്യഭ്യാസം പ്രഖ്യാപിച്ച് യുഎഇ വിദ്യാഭ്യാസ മന്ത്രാലയം. യുഎഇയിലെ മുഴുവന് സര്ക്കാര്-ഇതര സ്കൂളുകളടക്കുമുള്ള വിദ്യഭ്യാസ സ്ഥാപനങ്ങള്ക്കും ഇതു ബാധകമായിരിക്കും. വിദ്യാര്ത്ഥികളുടെയും അദ്ധ്യാപകരുടെയും സുരക്ഷയും സംരക്ഷണവും മാനിച്ചാണ് ഈ തീരുമാനം.
രണ്ടാഴ്ച്ച മുമ്പാണ് യുഎഇയിലെ മുഴുവന് വിദ്യാഭ്യാസ സ്ഥാപനങ്ങള്ക്കും വസന്തകാല അവധി നേരത്തെയാക്കി വിദ്യാഭ്യാസ മന്ത്രാലയം ഉത്തരവിട്ടത്. നേരത്തെ മാര്ച്ച് 13ന് ആരംഭിച്ച് മാര്ച്ച് 29ന് അവസാനിക്കേണ്ട സ്പ്രിംഗ് അവധി മാര്ച്ച് 6 മുതല് തുടങ്ങി മാര്ച്ച് 22വരെ പ്രഖ്യാപിക്കുകയായിരുന്നു. മാര്ച്ച് 23 മുതല് സ്കൂള് വീണ്ടും തുറന്ന് പ്രവര്ത്തിക്കാന് ഉത്തരവിടുകയായിരുന്നു.
ഇറാന് ഗള്ഫ് രാജ്യങ്ങള്ക്ക് മേലുള്ള ആക്രമണം തുടങ്ങിയതിന്റെ അടിസ്ഥാനത്തില് മാര്ച്ച് രണ്ട് മുതലാണ് വിദൂര വിദ്യാഭ്യാസം യുഎഇ സര്ക്കാര് തുടക്കമിട്ടത്. പിന്നീട് സാഹചര്യം അനുകൂലമല്ലാത്തതിനാല് അത് തുടരുകയായിരുന്നു.
സിബിഎസ്സി സ്കൂളുകളുടെ അടുത്ത അക്കാദമിക് വര്ഷം തുടങ്ങുന്നത് ഏപ്രില് ആദ്യ വാരത്തിലാണ്. ഇന്നത്തെ പ്രഖ്യാപനത്തോടെ അടുത്ത അക്കാദമിക് വര്ഷാരംഭം സ്കൂളുകള് വിദൂര വിദ്യാഭ്യാസം കൊണ്ട് തുടങ്ങേണ്ടിവരും. ഇന്ത്യനല്ലാത്ത ഇതര സിലബസ്സുകള് മുഴുവനും അവരുടെ മൂന്നാം ടേം അക്കാദമിക് ആരംഭം മാര്ച്ച് 23 മുതല് വിദൂര വിദ്യഭ്യാസമായി ആരംഭിക്കും.
രാജ്യത്തെ അവസ്ഥകള് അനുകൂലമാവുന്ന സാഹചര്യത്തില് സ്കൂളുകള്ക്ക് നേരിട്ട് ക്ലാസുകള് ആരംഭിക്കാന് അപേക്ഷ അയക്കാവുന്നതാണ്. തുടര്ന്ന് ബന്ധപ്പെട്ട അധികൃതര് കാര്യങ്ങള് വിലയിരുത്തി വേണ്ട രൂപത്തില് പ്രഖ്യാപനം നടത്തുന്നതായിരിക്കും.
അതേ സമയം സര്ക്കാര് സ്ഥാപനങ്ങളിലെ ചില വിഭാഗങ്ങളിലെ ഉദ്യോഗാര്ത്ഥികള്ക്കും വര്ക്ക് ഫ്രം ഹോം പ്രഖ്യാപിച്ചിട്ടുണ്ട്. ഇത് വീട്ടിലെ വിദ്യാര്ത്ഥികളെ നോക്കേണ്ടവര്ക്കായിരിക്കും ബാധകമാവുക. സ്കൂളുകള് ഓണ്ലൈനാവുന്ന സാഹചര്യത്തില് ചെറിയ കുഞ്ഞുങ്ങളടക്കം എട്ടാം ക്ലാസ് വരെയുള്ള വിദ്യാര്ത്ഥികള് വീട്ടിലുള്ളവര്ക്കായിരിക്കും ഈ നിബന്ധന സാധ്യമാവുക. ഓണ്ലൈനായി വിദ്യാഭ്യാസം തുടരുന്ന സാഹചര്യം വരെ ഇത് അവര്ക്ക് ബാധകമാവും. വിദ്യാര്ത്ഥികളുടെ സംരക്ഷണത്തിന് പ്രാധാന്യം കൊടുത്താണ് പുതിയ തീരുമാനം.
