ആലപ്പുഴ: യു.ഡി.എഫ് സർക്കാരിനുള്ളിലെ ആഭ്യന്തര തർക്കങ്ങൾക്കും മന്ത്രിസഭയിലെ അഭിപ്രായ ഭിന്നതകൾക്കുമെതിരെ രൂക്ഷവിമർശനവുമായി അമ്പലപ്പുഴ എം.എൽ.എയും മുൻ മന്ത്രിയുമായ ജി. സുധാകരൻ രംഗത്തെത്തി. ഓരോരോ കാര്യങ്ങൾ നേടിയെടുക്കുന്നതിനായി മുന്നണിക്കുള്ളിൽ അനാവശ്യമായി തർക്കിക്കാതെ മുഖ്യമന്ത്രി വി.ഡി. സതീശനെ സ്വതന്ത്രമായി ഭരിക്കാൻ അനുവദിക്കണമെന്ന് അദ്ദേഹം ആവശ്യപ്പെട്ടു. ആലപ്പുഴയിൽ നടന്ന ഒരു പൊതുപരിപാടിയിൽ സംസാരിക്കവെയായിരുന്നു സുധാകരന്റെ ഈ തുറന്നടിക്കൽ.
മന്ത്രിസഭയിൽ കഴിവില്ലാത്തവരുണ്ടെങ്കിൽ അവരെ അപ്പോൾ തന്നെ മാറ്റണമെന്നും മുഖ്യമന്ത്രിയെ വെല്ലുവിളിക്കുന്ന ഒരു മന്ത്രി പോലും മന്ത്രിസഭയിൽ തുടരാൻ പാടില്ലെന്നും അദ്ദേഹം വ്യക്തമാക്കി. മുഖ്യമന്ത്രിയുടെ വിശ്വാസമാണ് ഒരാൾക്ക് മന്ത്രിസ്ഥാനത്ത് തുടരാനുള്ള പ്രധാന ഘടകം. മുഖ്യമന്ത്രിക്കെതിരെ ഒരു മന്ത്രി പരസ്യപ്രസ്താവന നടത്തുന്നത് ഭരണഘടനാവിരുദ്ധമാണ്. അങ്ങനെ ചെയ്യുന്നവർ എത്ര വലിയ നേതാവായാലും ഉടനടി പുറത്താക്കി പകരം മറ്റൊരാളെ നിയമിക്കാനുള്ള അധികാരം മുഖ്യമന്ത്രിക്കുണ്ട്. എന്നാൽ, മുന്നണിയിലെ രാഷ്ട്രീയ സമവാക്യങ്ങൾ കാരണം ഇടവും വലവും നോക്കേണ്ടതിനാലാണ് മുഖ്യമന്ത്രി അത്തരം കർശന നടപടികൾ സ്വീകരിക്കാത്തതെന്നും സുധാകരൻ പരിഹസിച്ചു.
പാർലമെന്റിലേക്ക് തിരഞ്ഞെടുക്കപ്പെട്ട ചില എം.പിമാർ സംസ്ഥാനത്ത് തിരിച്ചെത്തി മന്ത്രിയാകാൻ ശ്രമിക്കുന്ന പ്രവണതയെയും അദ്ദേഹം രൂക്ഷമായി വിമർശിച്ചു. സംസ്ഥാന നിയമസഭയേക്കാൾ എത്രയോ വലിയ പദവിയാണ് പാർലമെന്റ് അംഗത്വമെന്ന തിരിച്ചറിവ് അവർക്കുണ്ടാകണമെന്ന് സുധാകരൻ ഓർമ്മിപ്പിച്ചു. ഗുരുവായൂർ ദേവസ്വം നിയമനങ്ങളടക്കമുള്ള വിഷയങ്ങളിൽ ചില മന്ത്രിമാരും ഘടകകക്ഷികളും മുഖ്യമന്ത്രിക്കെതിരെ പരസ്യമായി അതൃപ്തി പ്രകടിപ്പിച്ച പശ്ചാത്തലത്തിലാണ് സുധാകരന്റെ ഈ പ്രതികരണം. അനാവശ്യമായ പോരുകളും വ്യക്തിപരമായ അസംതൃപ്തികളും അവസാനിപ്പിച്ച് ജനങ്ങൾ ആഗ്രഹിക്കുന്ന മികച്ച ഭരണം കാഴ്ചവെക്കാൻ സർക്കാർ തയ്യാറാകണമെന്നും, അതിന് ഇപ്പോഴും സാധിക്കുമെന്നും അദ്ദേഹം കൂട്ടിച്ചേർത്തു.