ദുബായ്: യുഎഇയുടെ 55-ാമത് ഈദ് അൽ ഇത്തിഹാദ് (ദേശീയ ദിനം) ആഘോഷങ്ങളോടനുബന്ധിച്ച് ദുബായിലെ സ്വകാര്യ സ്കൂളുകൾക്കും ഉന്നത വിദ്യാഭ്യാസ സ്ഥാപനങ്ങൾക്കും മൂന്ന് ദിവസത്തെ ഔദ്യോഗിക അവധി പ്രഖ്യാപിച്ചു. ഡിസംബർ 2 ബുധനാഴ്ച മുതൽ ഡിസംബർ 4 വെള്ളിയാഴ്ച വരെയാണ് അവധി. വാരാന്ത്യ അവധി ദിവസങ്ങളായ ശനി, ഞായർ കൂടി ഉൾപ്പെടുന്നതോടെ വിദ്യാർത്ഥികൾക്ക് തുടർച്ചയായി അഞ്ച് ദിവസത്തെ നീണ്ട അവധിയാണ് ലഭിക്കുന്നത്. അവധിക്ക് ശേഷം ഡിസംബർ 7 തിങ്കളാഴ്ച ക്ലാസുകളും സാധാരണ പ്രവർത്തനങ്ങളും പുനരാരംഭിക്കുമെന്ന് നോളജ് ആൻഡ് ഹ്യൂമൻ ഡെവലപ്മെന്റ് അതോറിറ്റി (KHDA) അറിയിച്ചു. 2026-ലെ അവസാനത്തെ പൊതു അവധിയാണിത്.
അതേസമയം, ദുബായിലെ ഏർളി ചൈൽഡ്ഹുഡ് സെന്ററുകൾക്ക് (നഴ്സറികൾ) ഡിസംബർ 2 ബുധനാഴ്ചയും ഡിസംബർ 3 വ്യാഴാഴ്ചയുമാണ് അവധി പ്രഖ്യാപിച്ചിരിക്കുന്നത്. രക്ഷിതാക്കളുടെയും സമൂഹത്തിന്റെയും ആവശ്യങ്ങൾ പരിഗണിച്ച് ഡിസംബർ 4 വെള്ളിയാഴ്ച കൂടി അവധി നൽകണമോ എന്ന കാര്യത്തിൽ അതത് സ്ഥാപനങ്ങൾക്ക് ഉചിതമായ തീരുമാനമെടുക്കാമെന്ന് അധികൃതർ നിർദ്ദേശിച്ചിട്ടുണ്ട്. ഇവയുടെ പ്രവർത്തനവും ഡിസംബർ 7 തിങ്കളാഴ്ച പുനരാരംഭിക്കും.
ദുബായ് ഗവൺമെന്റ് ഹ്യൂമൻ റിസോഴ്സസ് ഡിപ്പാർട്ട്മെന്റിന്റെ (DGHR) അറിയിപ്പ് പ്രകാരം എമിറേറ്റിലെ പൊതുമേഖലാ ജീവനക്കാർക്കും ഡിസംബർ 2 ബുധനാഴ്ച മുതൽ ഡിസംബർ 4 വെള്ളിയാഴ്ച വരെ മൂന്ന് ദിവസത്തെ അവധിയായിരിക്കും. വാരാന്ത്യ അവധി കൂടി ചേരുമ്പോൾ സർക്കാർ ജീവനക്കാർക്കും അഞ്ച് ദിവസത്തെ അവധി ലഭിക്കും. എന്നാൽ രാജ്യത്തെ സ്വകാര്യ മേഖലാ ജീവനക്കാർക്ക് ഡിസംബർ 2, 3 (ബുധൻ, വ്യാഴം) തീയതികളിൽ രണ്ട് ദിവസത്തെ ശമ്പളത്തോടു കൂടിയ അവധിയാണ് മാനവ വിഭവശേഷി സ്വദേശിവൽക്കരണ മന്ത്രാലയം പ്രഖ്യാപിച്ചിട്ടുള്ളത്.
1971 ഡിസംബർ 2-ന് എമിറേറ്റുകൾ ഒന്നിച്ച് യുഎഇ രൂപീകൃതമായതിന്റെ സ്മരണയ്ക്കാണ് എല്ലാ വർഷവും ഈദ് അൽ ഇത്തിഹാദ് ആഘോഷിക്കുന്നത്. 2026 ‘കുടുംബ വർഷമായി’ (Year of the Family) ആചരിക്കുന്നതിനാൽ, ‘ഐക്യത്തിലെ സ്വന്തം ഇടം’ (Belonging in Unity) എന്ന പ്രമേയത്തിൽ കുടുംബബന്ധങ്ങൾക്കും സാമൂഹിക ഐക്യത്തിനും ഊന്നൽ നൽകിക്കൊണ്ടുള്ള വിപുലമായ ആഘോഷങ്ങളാണ് ഇത്തവണ രാജ്യത്തുടനീളം ഒരുക്കിയിരിക്കുന്നത്.