കെയ്റോ: ഈജിപ്തിൽ രണ്ട് പാസഞ്ചർ ട്രെയിനുകൾ തമ്മിൽ കൂട്ടിയിടിച്ചുണ്ടായ ദാരുണമായ അപകടത്തിൽ നാല് പേർ കൊല്ലപ്പെട്ടു. അപകടത്തിൽ 120-ലധികം യാത്രക്കാർക്ക് പരിക്കേറ്റതായാണ് ഔദ്യോഗിക വിവരം. അതിവേഗത്തിൽ സഞ്ചരിക്കുകയായിരുന്ന ട്രെയിനുകൾ കൂട്ടിയിടിച്ചതിന്‍റെ ആഘാതത്തിൽ നിരവധി ബോഗികൾ പാളത്തിൽനിന്ന് തെന്നിമാറി തകരുകയായിരുന്നു.
അപകടവിവരമറിഞ്ഞ ഉടൻ തന്നെ വൻ സന്നാഹത്തോടെ സിവിൽ ഡിഫൻസ് സംഘങ്ങളും അടിയന്തര രക്ഷാപ്രവർത്തകരും സംഭവസ്ഥലത്തെത്തി. തകർന്ന ബോഗികൾ വെട്ടിപ്പൊളിച്ചാണ് ഉള്ളിൽ കുടുങ്ങിക്കിടന്ന യാത്രക്കാരെ രക്ഷാപ്രവർത്തകർ പുറത്തെടുത്തത്. പരിക്കേറ്റവരെ ഉടൻ തന്നെ സമീപത്തെ വിവിധ ആശുപത്രികളിലേക്ക് മാറ്റി. ഇവരിൽ ചിലരുടെ ആരോഗ്യനില അതീവ ഗുരുതരമായി തുടരുന്നതിനാൽ മരണസംഖ്യ ഇനിയും ഉയർന്നേക്കാമെന്ന് ആരോഗ്യ മന്ത്രാലയ വൃത്തങ്ങൾ ആശങ്ക പ്രകടിപ്പിച്ചു.
കൂട്ടിയിടിയെ തുടർന്ന് ഈ റൂട്ടിലെ ട്രെയിൻ ഗതാഗതം പൂർണമായി തടസ്സപ്പെട്ടു. ട്രാക്കിൽ അവശിഷ്ടങ്ങൾ നീക്കം ചെയ്യാനും സർവീസുകൾ സാധാരണ നിലയിലാക്കാനുമുള്ള ഊർജ്ജിത ശ്രമങ്ങൾ തുടരുകയാണ്. സിഗ്നൽ തകരാറാണോ അതോ പൈലറ്റിന്‍റെ പിഴവാണോ അപകടത്തിന് പിന്നിലെന്ന് വ്യക്തമല്ല. സംഭവത്തിൽ ഈജിപ്ഷ്യൻ റെയിൽവേ അതോറിറ്റി ഉന്നതതല സാങ്കേതിക അന്വേഷണത്തിന് ഉത്തരവിട്ടിട്ടുണ്ട്.
