മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് രാജ്യതലസ്ഥാനത്തെ രാംലീല മൈതാനത്ത് സംഘടിപ്പിച്ച ഇന്ത്യാ മുന്നണിയുടെ ‘ചലോ ദില്ലി’ മഹാറാലി കേന്ദ്ര സർക്കാരിനെതിരെയുള്ള ശക്തമായ രാഷ്ട്രീയ പോർമുഖമായി മാറി. കേന്ദ്ര ഭരണകൂടത്തെയും തിരഞ്ഞെടുപ്പ് കമ്മീഷനെയും രൂക്ഷമായ ഭാഷയിലാണ് പ്രതിപക്ഷ നേതാക്കൾ കടന്നാക്രമിച്ചത്.
‘മോദിയെ പ്രധാനമന്ത്രിയാക്കിയത് വോട്ട് കൊള്ള’: രാഹുൽ ഗാന്ധി
“ഗ്യാനേഷ് കുമാർ തിരഞ്ഞെടുപ്പ് കമ്മീഷന്റെ തലപ്പത്തില്ലായിരുന്നെങ്കിൽ നരേന്ദ്ര മോദി വീണ്ടും പ്രധാനമന്ത്രിയാകില്ലായിരുന്നു” എന്ന് റാലിയെ അഭിസംബോധന ചെയ്തുകൊണ്ട് ലോക്‌സഭാ പ്രതിപക്ഷ നേതാവ് രാഹുൽ ഗാന്ധി ആഞ്ഞടിച്ചു. സാധാരണ മോഷണമല്ല, രാജ്യത്തെ ഓരോ പൗരന്റെയും ശബ്ദം കവർന്നെടുക്കുന്ന രാജ്യദ്രോഹമാണ് നടന്നതെന്ന് അദ്ദേഹം ആരോപിച്ചു. ഭരണഘടനാ സ്ഥാപനങ്ങളെയും ആർ.എസ്.എസ്. കൈപ്പിടിയിലൊതുക്കുകയാണെന്നും, തിരഞ്ഞെടുപ്പ് പ്രക്രിയയിൽ അട്ടിമറി നടത്തി ബിജെപിയെ അധികാരത്തിലേറ്റിയ ഗ്യാനേഷ് കുമാർ വിചാരണ നേരിട്ട് ജയിലിൽ പോകേണ്ടി വരുമെന്നും രാഹുൽ മുന്നറിയിപ്പ് നൽകി.
ഒറ്റക്കെട്ടായി പ്രതിപക്ഷ നിര; രൂക്ഷ വിമർശനം
- മല്ലികാർജുൻ ഖർഗെ (കോൺഗ്രസ് അധ്യക്ഷൻ): അന്വേഷണ ഏജൻസികളെ കാണിച്ച് പ്രതിപക്ഷത്തെ ഭയപ്പെടുത്താമെന്ന് കേന്ദ്രം കരുതേണ്ടെന്ന് ഖർഗെ പറഞ്ഞു. ജനാധിപത്യം സംരക്ഷിക്കാൻ നരേന്ദ്ര മോദിയെ അധികാരത്തിൽനിന്ന് പുറത്താക്കണമെന്നും അദ്ദേഹം ആവശ്യപ്പെട്ടു.
- മമത ബാനർജി (തൃണമൂൽ കോൺഗ്രസ്): ബംഗാളിൽ ബിജെപി നടത്തിയ വോട്ട് കൊള്ള രാജ്യത്തുടനീളം ആവർത്തിക്കാൻ അനുവദിക്കില്ലെന്ന് മമത വ്യക്തമാക്കി.
- അഖിലേഷ് യാദവ് (സമാജ്‌വാദി പാർട്ടി): ബിജെപി സ്വന്തം പ്രവർത്തകരെ മാത്രമാണ് പൗരന്മാരായി കാണുന്നതെന്നും രാംലീല മൈതാനത്തെ പ്രതിഷേധം രാജ്യത്ത് പുതിയ ചരിത്രമെഴുതുമെന്നും അദ്ദേഹം പറഞ്ഞു.
- എം.എ. ബേബി (സിപിഎം ജനറൽ സെക്രട്ടറി): വോട്ടർ പട്ടികയിൽ കൃത്രിമം കാണിച്ച് വോട്ട് കൊള്ള നടത്തിയ ഗ്യാനേഷ് കുമാറിനെ പ്രോസിക്യൂട്ട് ചെയ്യണമെന്ന് എം.എ. ബേബി ആവശ്യപ്പെട്ടു. കർഷകരുടെ വരുമാനം ഇരട്ടിയാക്കുമെന്ന് പ്രഖ്യാപിച്ച ഭരണകൂടത്തിന്‍റെ കീഴിൽ കർഷക ആത്മഹത്യകളാണ് ഇരട്ടിയായതെന്നും അദ്ദേഹം കൂട്ടിച്ചേർത്തു.
- തേജസ്വി യാദവ് (ആർജെഡി): ‘ശകുനിമാർ’ ചരടുവലികൾ നടത്തുമ്പോൾ രാജ്യത്ത് ജനാധിപത്യ സംരക്ഷണത്തിനായി മഹാഭാരത യുദ്ധം നയിക്കേണ്ട സാഹചര്യമാണെന്ന് തേജസ്വി യാദവ് പരിഹസിച്ചു.
വോട്ടുപട്ടിക പരിഷ്കരണത്തിന്‍റെ (Special Intensive Revision – SIR) മറവിൽ ലക്ഷക്കണക്കിന് വോട്ടർമാരെ ഒഴിവാക്കിയെന്ന ഗുരുതര ആരോപണം ഉന്നയിച്ചാണ് ഇന്ത്യാ സഖ്യം തലസ്ഥാനത്ത് വൻ ജനപങ്കാളിത്തത്തോടെ റാലി സംഘടിപ്പിച്ചത്. രാജ്യത്തിന്‍റെ വിവിധ ഭാഗങ്ങളിൽ നിന്നായി വൻ ജനാവലി പങ്കെടുത്ത റാലിയെത്തുടർന്ന് ഡൽഹിയിൽ അതീവ സുരക്ഷയും ഗതാഗത നിയന്ത്രണങ്ങളും ഏർപ്പെടുത്തിയിരുന്നു.
