ന്യൂഡല്‍ഹി: കോക്രോച്ച് ജനതാ പാര്‍ട്ടിയുടെ മുഖ്യ പ്രവര്‍ത്തകരായ സൗരവ് ദാസും അശുതോഷ് റാങ്കയും 7 ദിവസത്തെ ജുഡീഷ്യല്‍ കസ്റ്റഡിക്ക് പിന്നാലെ ഇന്ന് ജയില്‍ മോചിതരായി. ഇവരുടെ മോചനത്തിന് സ്‌പെഷ്യല്‍ എക്‌സിക്യൂട്ടീവ് മജിസ്‌ട്രേറ്റ് കോടതിയാണ് ഉത്തരവിട്ടത്. ഉത്തരവിന് പിന്നാലെ പത്ര സമ്മേളനം വിളിച്ച് സിജെപി നേതാവ് അഭിജിത് ദീപ്‌കെ തന്‍റെ സന്തോഷം പ്രകടിപ്പിച്ചു.
അവര്‍ എന്നെക്കാളും മികച്ചവരാണ്. അവര്‍ക്ക് വേണ്ടി ജീവന്‍ പണയം വെക്കാന്‍ പോലും ഞാന്‍ തയ്യാറാണ്. സൗരവിനെയും അശുതോഷ് റാങ്കയെ കുറിച്ച് പറയുമ്പോള്‍ അഭിജിത് വികാരധീനനായിരുന്നു. ഇനി ഒരാളും ഒറ്റയ്ക്ക് പൂന്തോട്ടത്തില്‍ നടക്കരുതെന്നും അദ്ദേഹം തമാശ രൂപേന പറഞ്ഞു.
ഗ്യാനേഷ് കുമാറിന്‍റെ രാജി ആവശ്യപ്പെട്ട് ജന്തര്‍ മന്തറില്‍ ഒക്ടോബര്‍ 13ന് പോലീസിന്‍റെ വിലക്ക് മറികടന്ന് പ്രതിഷേധിച്ച കേസിലാണ് ഇരുവരും അറസ്റ്റിലായത്. അറസ്റ്റിന് പിന്നാലെ അവരെ അഞ്ച് ദിവസം പോലീസ് റിമാന്‍ഡ് ചെയ്തു. ഒക്ടോബര്‍ 19ന് കോടതി വീണ്ടും ഇവരെ രണ്ട് ദിവസം കൂടി റിമാന്‍ഡ് കാലാവധി നീട്ടുകയായിരുന്നു.
