തിരുവനന്തപുരം: തലസ്ഥാന നഗരിയില് വീണ്ടുമൊരു അപകടം. തിരുവനന്തപുരം വെമ്പായത്ത് ഹാപ്പിലാന്ഡ് അമ്യൂസ്മെന്റ് പാര്ക്കില് റൈഡ് തകര്ന്ന് വീണ് അഞ്ച് പേര്ക്ക് പരിക്ക്. ഇതില് ഒരാളുടെ നില ഗുരുതരം. വന്ദുരന്തം തലനാഴികയ്ക്കാണ് ഒഴിവായതെന്ന് ദൃക്സാക്ഷികള് പറയുന്നു. പാര്ക്ക് നടത്താന് ആവശ്യമായ സുരക്ഷാ നടപടികള് കൈക്കോണ്ടില്ലെന്ന് ആക്ഷേപം. പരിക്കേറ്റവരില് ഒരാളെ തിരുവനന്തപുരം മെഡിക്കല് കോളേജിലേക്കും നാലു പേരെ സ്വകാര്യ ആശുപത്രിയിലേക്കുമാണ് കൊണ്ട് പോയത്. നാഗര് കോവില് സ്വദേശികളായ ഒരു കുടുംബത്തിലെ അഞ്ച് പേരാണ് അപകടത്തില്പെട്ടത്.
പെരുന്നാള് അവധിയായതിനാല് നല്ലൊരു തിരക്ക് പാര്ക്കിലുണ്ടായിരുന്നു. ചങ്ങലയില് ഘടിപ്പിച്ച വൃത്താകൃതിയില് കറങ്ങുന്ന റൈഡാണ് അപകടത്തില് പെട്ടത്. 15ഓളം കുട്ടികളായിരുന്നു റൈഡിലുണ്ടായിരുന്നത്. ലാന്ഡ് റൈഡിന്റെ വെല്ഡിങ് ഇളകി പൊട്ടി വീഴുകയായിരുന്നു. പോലീസ് അന്വേഷണം ആരംഭിച്ചിട്ടുണ്ട്.
കഴിഞ്ഞ മാസം ഇതേ പാര്ക്കില് വന്ന ഒരു കുട്ടി കുളത്തില് മുങ്ങിമരിച്ചിരുന്നു. അന്ന് സുരക്ഷാ പാളിച്ചയെന്ന ആക്ഷേപത്തില് പൂര്ണ്ണ അന്വേഷണം നടത്തി വീണ്ടും അനുമതി നല്കി പ്രവര്ത്തിക്കുകയായിരുന്നു. വേണ്ട സുരക്ഷ നടപടികള് പാര്ക്ക് കൈകൊണ്ടില്ലെന്ന് പരക്കേ ആക്ഷേപമുണ്ട്. അപകടം നടന്നിട്ടും മറ്റു റൈഡുകള് നിര്ത്താതെ പ്രവര്ത്തിക്കുകയായിരുന്നു. പരിക്കേറ്റവരെ ആശുപത്രിയില് കൊണ്ട് പോവാന് ആംബുലന്സ് പോലും സജ്ജമായിരുന്നില്ല. മണ്ഡലം എം എല് എ ജിആര് അനില് എത്തിയാണ് എല്ലാ നിര്ത്തിവെപ്പിച്ചത്. ഇനി പൂര്ണ്ണ പരിശോധനകള്ക്ക് ശേഷം മാത്രം പ്രവര്ത്തിച്ചാല് മതിയെന്ന് ഉത്തരവും നല്കി. അതേ സമയം പാര്ക്ക് പ്രവര്ത്തിക്കാനുള്ള സുരക്ഷാ മാനദണ്ഡം പാലിച്ചിട്ടുണ്ടെന്നാണ് പഞ്ചായത്ത് അധികൃതരുടെ വാദം.
