കീവ്: ഒഴിയാ ബാധ പോലെ തുടരുന്ന റഷ്യന്-യുക്രയ്ന് യുദ്ധം വീണ്ടും ചര്ച്ചയാവുന്നു. യുക്രയ്നില് റഷ്യന് സേന വിടുന്ന പുതിയ ഡ്രോണ് ആക്രമണം യുദ്ധ കുറ്റമെന്നാണ് യുക്രയ്ന് പ്രസിഡണ്ട് സെലന്സ്കി ആരോപിച്ചിരിക്കുന്നത്. സാധാരണക്കാരെ പിന്തുടര്ന്ന് ആക്രമിക്കുന്നത് യുദ്ധ രീതിയല്ലെന്നും അദ്ദേഹം പറഞ്ഞു. യുക്രയ്ന് നഗരമായ ഖേര്ണസില് തെരുവു കച്ചവടക്കാരനെ പിന്തുടര്ന്ന് ആക്രമിക്കുന്ന റഷ്യന് സഫാരി ഡ്രോണിന്റെ വീഡിയോ പങ്കുവെച്ചാണ് സെലന്സ്കി റഷ്യക്കെതിരെ ആരോപമം ഉന്നയിച്ചത്.
തെരുവില് കച്ചവടം നടത്തുന്ന ഒരു പുരുഷനെ ഡ്രോണ് ആക്രമിക്കാന് വരുന്നു. അയാള് തന്റെ കച്ചവട വാഹനത്തിന്റെ പിന്നിലായ് ഒളിക്കാന് ശ്രമിക്കുന്നു. പക്ഷേ ഡ്രോണ് അയാളെ വിടാതെ പിന്തുടരുകയും കൈകൂപ്പി അയാള് സാധാരണക്കാരനെന്ന് വ്യക്തമാക്കുകയും ചെയ്തു. പിന്നാലെ തുടര്ന്ന ഡ്രോണ് അയാളുടെ മുന്നില് വെച്ച് തന്നെ പൊട്ടിത്തെറിക്കുകയും ചെയ്തു. വീഡിയോ ദൃശ്യത്തില് കാണുന്ന കാഴ്ച്ച ഇതായിരുന്നു. യുക്രയ്ന് വിദേശകാര്യ മന്ത്രിയാണ് ആദ്യം ഈ ദൃശ്യം പുറത്ത് വിട്ടത്. വൈകാതെ പ്രസിഡണ്ടും തന്റെ എക്സ് അക്കൗണ്ടില് റഷ്യയ്ക്കെതിരെ യുദ്ധക്കുറ്റമെന്ന് ആരോപിച്ച് വീഡിയോ പങ്കുവെക്കുകയായിരുന്നു.
ഉന്തുവണ്ടിയില് പച്ചക്കറി വില്ക്കുന്ന യൂറി എന്നയാളാണ് ആക്രമത്തിനിരയായതെന്ന് യുക്രയ്ന് മാധ്യമങ്ങള് അറിയിച്ചു. ഇയാള് വെളുത്തുള്ളി പൊളിക്കുന്നതിനിടയിലാണ് ഡ്രോണ് ആക്രമെത്തിനെത്തിയത്. ഡ്രോണില് നിന്നുള്ള ചീളുകള് തെറിച്ച് യൂറിക്ക് പരിക്കേല്ക്കുകയും ചെയ്തിട്ടുണ്ട്. അദ്ദേഹം നിലവില് ആശുപത്രിയില് ചികിത്സയിലാണ്.
നിലവില് റഷ്യയില് നിന്ന് സഫാരി ഡ്രോണുകളുടെ ആക്രമണമാണ് നടക്കുന്നതെന്നും അത് സാധാരണക്കാരെയാണ് വേട്ടയാടുന്നതെന്നും സെലന്സ്കി ആരോപിച്ചു. ഖേര്ണസിലെ ജനങ്ങള്ക്കാണ് ഈ ദുരിതം നേരിടേണ്ടി വരുന്നത്.
എന്ത് കൊണ്ട് സഫാരി ഡ്രോണ്?
കാട്ടിലൂടെയുള്ള യാത്രയ്ക്കിടെയില് മുന്നില് കാണുന്ന എല്ലാ മൃഗങ്ങളെയും വെടിവെച്ചിടുന്ന രൂപമാണ് റഷ്യ നിലവില് നടത്തുന്നത്. അത് കൊണ്ടാണ് ഈ ഡ്രോണ് ആക്രമണത്തിന് സഫാരി എന്ന് പേരുവെക്കുന്നതെന്ന് യുക്രയ്ന് ഡ്രോണ് ബറ്റാലിയനായ സിഗ്നത്തിന്റെ ഉദ്യോഗസ്ഥന് രാജ്യാന്തര മീഡിയകളോട് പറഞ്ഞു.
