തിരുവനന്തപുരം: അനന്തപുരിയില് ഇന്ന് നടന്ന സത്യപ്രതിജ്ഞാ ചടങ്ങ് കേവലമൊരു മുഖ്യമന്ത്രിയുടെയുടെയും മന്ത്രിമാരുടെയും സത്യവാചകം ചൊല്ലി അധികാരമേറ്റെടുക്കുന്ന ചടങ്ങ് മാത്രമായിരുന്നില്ല. ചേര്ത്തു നില്പ്പിന്റെയും സൗഹൃദ്ദത്തിന്റെയും ഒരു സുന്ദര സന്ദേശവും കൂടി ഇന്നത്തെ ചടങ്ങ് വിളിച്ചോതുന്നുണ്ട്. കയ്യില് വിഡീ സതീശന്റെ ഫോട്ടോയേന്തി വന്ന അമ്മാളുവമ്മയെന്ന സീതാലക്ഷ്മി അമ്മ സ്റ്റേജില് കയറിയപ്പോള് ചേര്ത്തുപിടിച്ചത് മകനോളം വാത്സ്യം കാട്ടിയ മുഖ്യമന്ത്രി വിഡി സതീശനും രാഹുല് ഗാന്ധിയും ചേര്ന്നായിരുന്നു. രോഷ പ്രകടനമോ സായുധ സംരക്ഷണ വലയത്തിനകത്തെ ക്രൂര ആക്ഷേപമോ അവിടെയുണ്ടായിരുന്നില്ല. പറവൂരിലെ അമ്മളുവമ്മ ഇന്നത്തെ ചടങ്ങിലെ വിവിഐപിയായിരുന്നു. പറവൂരില് നിന്ന് സത്യ പ്രതിജ്ഞാ ചടങ്ങിന് രാവിലെ തന്നെ അവര് സെന്ട്രല് സ്റ്റേഡിയത്തില് എത്തിയിരുന്നു. പ്രിയപ്പെട്ട നാട്ടുകാരി സദസ്സിലുണ്ടെന്നറിഞ്ഞപ്പോള് മുഖ്യമന്ത്രി നേരിട്ട് ഉത്തരവിട്ടായിരുന്നു അമ്മയെ വേദിയിലെത്തിച്ചത്.
പ്രളയ സമയത്ത് അമ്മാളുവമ്മയ്ക്ക് വേണ്ടവിധ സഹായങ്ങള് വാഗ്ദാനം ചെയ്ത നന്ദിയായിരുന്നു അവര്ക്ക് ഇപ്പോഴും വിഡീ സതീശനോട്. മകനോളം സ്നേഹമുണ്ടെന്ന് എടുത്തു പറഞ്ഞ അമ്മയുടെ പേര് മാറ്റിയതും സതീശനാണെന്ന് മാധ്യമങ്ങള്ക്ക് മുന്നില് വ്യക്തമാക്കി.
സത്യപ്രതിജ്ഞാ ചടങ്ങിന്റെ വേദിയില് ആദ്യ നിരയില് തന്നെ രാഹുല് ഗാന്ധിയും പ്രിയങ്ക ഗാന്ധിയും മല്ലികാര്ജുന് ഘാര്ഗെയ്ക്കും മറ്റു സംസ്ഥാന മുഖ്യമന്ത്രിമാര്ക്കൊപ്പം പ്രതിപക്ഷ നേതാവ് പിണറായി വിജയനും ബിനോയ് വിശ്വത്തിനും ബിജെപി സംസ്ഥാന പ്രസിഡണ്ട് രാജീവ് ചന്ദ്രേശേഖറിനും സിപിഐഎം സംസ്ഥാന സെക്രട്ടറി എം വി ഗോവിന്ദനുമൊക്കെ ഇടം നല്കിയതും ഏറെ വിസ്മയിപ്പിച്ച വേദിയാക്കി മാറ്റി. ചിലരെ സദസ്സിലിരുത്തി മറ്റു ചിലരെ വേദിയിലിരുത്തി നടന്ന മുമ്പത്തെ സത്യപ്രതിജ്ഞാ ചടങ്ങുകളില് നിന്ന് വ്യത്യാസമായിരുന്നു ഇത്. കഴിഞ്ഞ 60 വര്ഷ ചരിത്രത്തില് ആദ്യമായായണ് യുഡിഎഫ് മുഴുവന് മന്ത്രിമാരും ആദ്യ ദിവസം തന്നെ സത്യപ്രതിജ്ഞാ ചൊല്ലി അധികാരമേല്ക്കുന്നത്.
ഇന്നലെ മന്ത്രമാരെ പ്രഖ്യാപിക്കുന്ന മാധ്യമ സമ്മേളനത്തിലും വിഡി സതീശന് മാധ്യമ പ്രവര്ത്തകരോട് സംവദിച്ചതും അവരുമായി നിന്ന് സെല്ഫി എടുത്തതുമൊക്കെ മാധ്യമ പ്രവര്ത്തകര്ക്കും വേറിട്ട അനുഭമായിരുന്നു.
