മെക്സിക്കോ: കായിക ലോകം കാതോര്ത്തിരിക്കുന്ന നിമിഷത്തിന് ഇനി മണിക്കൂറുകള് മാത്രം ബാക്കി. ലോകം ഇനി യുദ്ധ ഭീതിയില് നിന്ന് കാല്പന്താവേശത്തിലേക്ക് നീങ്ങും. കിക്കോഫിന് മണിക്കൂറുകള് മാത്രം ബാക്കി നില്ക്കെ മെക്സിക്കോയില് ജനാരവം തുടങ്ങിക്കഴിഞ്ഞു. ഉദ്ഘാടന മത്സരത്തില് ആതിഥേയരായ മെക്സിക്കോ ദക്ഷിണാഫ്രിക്കയെ നേരിടും. അമേരിക്ക, കാനഡ, മെക്സിക്കോ സംയുക്തമായി ആതിഥേയത്വം വഹിക്കുന്ന ലോകകപ്പിന് ഇത്തവണ 48 ടീമുകളുണ്ടെന്നതും വേറിട്ടൊരു പ്രത്യേകതയാണ്. നാല് ടീമുകള്, 12 ഗ്രൂപ്പുകളിലായി തിരിച്ചാണ് പ്രാഥമിക റൗണ്ട് മത്സരങ്ങള് നടക്കുന്നത്.
ജൂണ് 11ന് ആരംഭിക്കുന്ന ലോകകപ്പ് മത്സരത്തിന്റെ കലാശപ്പോരാട്ടം ജൂലൈ 19ന് ഇന്ത്യന് സമയം പുലര്ച്ച 12.30ന് ന്യുയോര്ക്ക്/ന്യൂജേഴ്സി സ്റ്റേഡിയത്തിലായിരിക്കും. ജൂണ് 29 മുതല് നോക്കൗട്ട് മത്സരങ്ങള്ക്ക് തുടക്കമാവും. ജൂലൈ നാല് മുതല് 8വരെ പ്രീക്വാര്ട്ടര് മത്സരങ്ങളും ജൂലൈ 10 മുതല് 12 വരെ ക്വാര്ട്ടര് മത്സരങ്ങളും നടക്കും. ജൂലൈ 15 &16നാണ് സെമീ ഫൈനല് മത്സരങ്ങള്.
മത്സരത്തിന് മണിക്കൂറുകള്ക്ക് മുമ്പ് തന്നെ ഉദ്ഘാടന ചടങ്ങിന് മൈതാനം സാക്ഷിയാവും. പോപ് ഗായിക ഷക്കീറയും നൈജീരിയല് ഗായകന് ബര്ണബോയും ചേര്ന്നായിരിക്കും ലോകകപ്പിന്റെ ഔദ്യോഗിക ഗാനമായ ഡായ ഡായ് ആലപിക്കുന്നത്. ഹോളിവുഡ് നടി സല്മ ഹയെക് ഉള്പ്പടെ ലോക താരങ്ങള് പലരും ഉദ്ഘാടന വേദിയിലുണ്ടാവും.
ഇരു ടീമുകളും വര്ഷങ്ങള്ക്ക് മുമ്പ് ഇതേ ദിവസം ജോഹന്നാസ് ബര്ഗില് വെച്ച് മാറ്റുരച്ച ചരിത്രം കൂടിയുണ്ട്. അന്നൊരു ഉദ്ഘാടന മത്സരത്തില് ഇരു ടീമുകളും സമനില നേടുകയായിരുന്നു. ഇത്തവണ വിജയത്തുടക്കത്തോടെയാവണമെന്ന പ്രതീക്ഷയോടെയാണ് ഇരു ടീമുകളും കളത്തിലിറങ്ങുന്നത്.
