തിരുവനന്തപുരം: നേരിയൊരാശ്വാസത്തിന് വിട, വീണ്ടും ശക്തമായ മഴയ്ക്ക് മുന്നറിയിപ്പ് നല്‍കി കാലാവസ്ഥ നിരീക്ഷണ കേന്ദ്രം. അടുത്ത ഏഴ് ദിവസം കേരളത്തില്‍ അതിശക്തമായ മഴയ്ക്കാണ് സാധ്യതയുള്ളത്. ജൂണ്‍ 12 മുതല്‍ 16 വരെയുള്ള ദിവസങ്ങളിലായിരിക്കും ശക്തമായ കാറ്റോടു കൂടിയുള്ള മഴയെത്തുക. ഇതില്‍ ജൂണ്‍ 14ന് മണിക്കൂറില്‍ 50- 60 വേഗതയിലുള്ള കാറ്റ് ശക്തമാവാനും സാധ്യതയുണ്ട്. ജനങ്ങള്‍ അതീവ ജാഗ്രതരായിരിക്കണമെന്നും കാലാവസ്ഥ നിരീക്ഷണ കേന്ദ്രം അറിയിച്ചു.
കണ്ണൂര്‍, കാസര്‍ഗോഡ് ജില്ലകള്‍ക്കാണ് 12,13,14 ദിവസങ്ങളില്‍ കനത്ത മുന്നറിയിപ്പുള്ളത്. ബാക്കിയുള്ള ജില്ലകള്‍ക്ക് ഇടവിട്ട ദിവസങ്ങളില്‍ റെഡ് അലേര്‍ട്ടും ഓറഞ്ച് അലേര്‍ട്ടും പ്രഖ്യാപിച്ചിട്ടുണ്ട്. നാളെ കണ്ണൂര്‍ , കാസര്‍ഗോഡ്, പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, മലപ്പുറം, കോഴിക്കോട് ജില്ലകള്‍ക്ക് യെല്ലോ അലേര്‍ട്ടട് പ്രഖ്യാപിച്ചിട്ടുണ്ട്.
വിദ്യാഭ്യാസ സ്ഥാപനങ്ങളുടെ അവധികളുമായി ബന്ധപ്പെട്ട പ്രഖ്യാപനം കാലാവസ്ഥ നിരീക്ഷണ കേന്ദ്രത്തിന്‍റെ നിര്‍ദ്ദേശമനുസരിച്ച് അതാത് ജില്ലകളിലെ കളക്ടമാര്‍ പ്രഖ്യാപിക്കും.
