ന്യൂഡല്ഹി: ഡല്ഹിയിലെ സത്യനികേതനിലുള്ള വിദ്യാര്ത്ഥികളുടെ ഹോസ്റ്റല് കെട്ടിടം തകര്ന്നു വീണു. നിരവധി പേര് കെട്ടിത്തിനകത്ത് കുടുങ്ങിക്കിടക്കുന്നതായ് സംശയം. പതിനഞ്ചു പേരെ രക്ഷപ്പെടുത്തി, ഇതില് മൂന്ന് പേരുടെ നില അതീവ ഗുരുതരം. ഡല്ഹി സര്വ്വകലാശാലയുടെ സൗത്ത് ക്യാംപസ് പോലീസ് സ്റ്റേഷന് പരിധിയിലുള്ള അഞ്ച് നില കെട്ടിടമാണ് തകര്ന്ന് വീണിരിക്കുന്നത്.
ഉച്ചയ്ക്കാണ് സംഭവം. ഞായാറാഴ്ച്ചയായതിനാല് കെട്ടിത്തിനകത്ത് ധാരാളം വിദ്യാര്ത്ഥികളുണ്ടായിരുന്നതായി സംശയിക്കുന്നു. ഹോസ്റ്റല് രജിസ്റ്റര് പരിശോധിച്ചാല് മാത്രമേ കൃത്യമായ കണക്ക് ലഭ്യമാവുകയുള്ളു. കെട്ടിടം തകര്ന്നയുടന് തന്നെ ഫയര് ഫോഴ്സും രക്ഷാപ്രവര്ത്തകരും സ്ഥലത്തെത്തി ആളുകളെ പുറത്തെടുക്കാന് ശ്രമം തുടങ്ങിയിരുന്നു. ഇപ്പോഴും രക്ഷാ പ്രവര്ത്തനം തുടരുന്നുണ്ട്. പ്രദേശവാസികളഉം വിവിധ രാഷ്ട്രീയ പാര്ട്ടികളുടെ വിദ്യാര്ത്ഥി സംഘടന ഭാരവാഹികളും വിദ്യാര്ത്ഥികളും രക്ഷാ പ്രവര്ത്തനത്തില് ഉള്പ്പെട്ടിട്ടുണ്ട്.
ഡല്ഹി സര്വ്വകാലാശാലയിലെ സൗത്ത് ക്യംപസില് പഠിക്കുന്ന കുടുതല് വിദ്യാര്ത്ഥികള് താമസിക്കുന്ന പ്രദേശമാണ് സത്യ നികേതന്. പക്ഷേ ഇവിടെയുള്ള പല കെട്ടിടങ്ങളുടെ സുരക്ഷയെ കുറിച്ചുള്ള ആശങ്ക മുമ്പ് തന്നെ ഉയര്ന്നിരുന്നു. നിലവില് അടുത്തുള്ള കെട്ടിടത്തില് നിര്മ്മാണ പ്രവര്ത്തനം നടക്കുന്നതിനാലും മഴയുള്ളതിനാലും അപകടത്തിന്റെ ആഘാതം വര്ദ്ധിപ്പിച്ചു. കെട്ടിട നിര്മ്മാണ തൊഴിലാളികളും അപകടത്തില്പെട്ടതായ് സംശയിക്കുന്നതായ് പ്രദേശ വാസികള് പറയുന്നുണ്ട്.
